Anem! per la lenga occitana: Òc!

MAI DE 100 PERSONAS DA LAS VALADAS OCCITANAS PARTICIPARÈN A LA MANIFESTACION DE CARCASSONA "
Anem! per la lenga occitana: Òc!"
Lo revelh de las Valadas Occitanas de la Província de Turin
de Ines Cavalcanti

A encuei son mai que 100 las personas inscrichas, doas corrieras sono prestas, per la partecipacion de las Valadas Occitanas a la manifestacion de Carcassona 2009 "Anem! per la lenga occitana: &Ograve...

A encuei son mai que 100 las personas inscrichas, doas corrieras sono prestas, per la partecipacion de las Valadas Occitanas a la manifestacion de Carcassona 2009 "Anem! per la lenga occitana: Òc! Aquesta manifestacion contén, entre lhi autri objèctius, lo sostenh a l'apèl "Lenga d'òc Patrimòni Mondial de l'Umanitat". La partecipacion de las Valadas Occitanas es particularament sinhificativa aquest'an per l'apòrt qualitatiu e sostancial que l'airal d'òc dal Piemont pòrta a la manifestacion. L'argument de l'inscripcion de "Elements rapresentatiu de la lenga e de la cultura d'òc dins la lista UNESCO dediaa al Patrimòni Immaterial de l'Umanitat" es mai que mai actual, es l'ocasion justa per trabalhar ensem sus lhi 3 Estats: Itàlia, França e Espanha per una candidatura internacionala. Es pas un argument rivendicatiu per lo fach que a una sia rason naturala d'èsser dins la novèla opportunitat que l'UNESCO vai ofrir e es sobretot un objectiu pan occitan que se pòt conquistar. Lo Moviment Occitan en general deu se confrontar serenament e abo metòde sus aqueste argument, abo las institucions, en construent abo paciença una tela dins la sociatat civila, en se ganhant sal champ l'inscripcion dins la lista.
Las doas corrieras da las Valadas Occitanas, van partir a 14.30 da Saluces, dins la plaça derant dal Tribunal, farèn tapa al champ d'atletica de Cors França a Coni vers 15.15 e a Lo Borg (a La Beguda) a 15.30. Se passarè lo Col de La Madalena e lo sera se manjarè a Ais de Provença, après se contunha per Carcassona. Lo matin d'après lhi a doas possibilitat: aquilhi que o vòlon pòlon anar a Montsegur abo la partença a 8 oras de matin e lo retorn a 13.30 (una corriera e 250,00 euros da divíder entre lhi partecipants), lhi autres que reston a Carcassona pòlon visitar la vila e se promenar dins lhi Jardin André Chénier (davant la gara) en visitant lo "Vilatge Occitan" abo lhi produchs de la marca "Terraire País Catar" e lhi stands de material occitan: malhietas, libres, bandieras etc. A 14 oras, d'aquela plaça part la manifestacion que passa dins la vila per arribar a las vielhas muralhas e a la granda plaça dal chastèl. Aqui tuchi ensem se vai eseguir lhi cants comuns de CANTEM PER ÒC! e lhi serèn lhi descors explicatius de lhi contenguts de la manifestacion.
Aquò terminat se retorna a lhi Jardin Andrè Chénier e aquì comença una granda fèsta collectiva abo sonaires que arribon da tota l'Occitània. Lhi productors de lhi País Catars son totjorn a disposicion per emplir las tripas vuedas di manifestants, parelh coma lhi productors de cultura son pronts a esfamar la vuelha de saber. Nosautres, coma Chambra d'Òc aurem una banquet onte anem presentar las doas publicacions novèlas de l'Occitània a pè: lo diari de viatge de Manuela Almonte e lo film de viatge de Elisa Nicoli. Las autritz serèn presentas a la manifestacion.
A 24 oras tornem a l'auberge e lo jorn d'après, en retornant dins las valadas farem sosta dins un país sinhificatiu de la Provença per visitar e minjar.
Vai remarcat que per lo premier bòt lhi a una fòrta partecipacion de l'airal de la Província de Turin a un apontament occitanista e que es presenta una delegacion de las Valadas Francoprovençalas que fai cap a la naissenta Tsambra Francoprovensal, secion autonòma de la Chambra d'Òc.
A Coni, a la Província, lo 5 de decembre se tenerè una jornada culturala de "Omatge a la montanha occitana" que fai part dal programa de las Celebracions di 150 ans de la Província de Coni. Dins aquela ocasion aurem já maniera de veire las fotografias e lo filmat de la manifestacion de Carcassona (a cura de Daniele Landra e Elisa Nicoli) e de eseguir ensem lhi chants de CANTEM PER ÒC!
Derant de la data de Carcassona lhi a encara un'ocasion per eseguir tuchi ensem lhi chants de Cantem per òc, a Lo Mèl (val Varacha), sande 10 d'octobre da 17 a 24 oras en companhia de Luca Pellegrino e abo lhi bals occitans di Katafòlk.