La Comission Nacionala Italiana per l'UNESCO organiza, en collaboracion abo la Region Piemont, la Comuna d'Ostana e la Chambra dÒc, la Jornada Internacionala de la Lenga Maire a Ostana lo 22 de febrier 2009, a conclusion dal 2008 dediat a An Internacional de las lengas.

Dins l'an 2008 las Valadas Occitanas se son evidenciaas a livèl internacional per:

• l'apèl "Lenga d'òc Patrimòni Mondial de l'Umanitat" qu'a obtengut lo sosten d'ents institucionals, associacions e testimònis per far en maniera que la lenga d'òc vene inscricha dins lo Patrimòni Immaterial de l'Umanitat;
• l'aveniment "L'Occitània a pè", una chaminada de 1350 km. da las Alps ai Pireneus, realizaa da 7 personas fixas acompanhaas, dins lhi 70 jorns de la chaminada, da mai de 2.000 personas, abo d'acuelhs oficials e festós tot al lòng dal chamin da la populacion, Associacions, Administracion Comunalas, Comunitats de Comunas, Províncias, Regions.

"Mercés la campanha de comunicacion de l'UNESCO en ocasion dal 2008 An Internacional de las lengas, avem lo grand esper que lhi aie de tangibles resultats en favor de las lengas maires e del multilinguisme e qu'aquò represente un ponch de fòrça dins l'accion di govèrns e de lhi organismes de cooperacion", aital ditz M. Koichiro Matsuura, Director General de l'UNESCO.
L'aveniment dal 21 de febrier a Ostana comença a 10 oras dins lo Municipi e vai anant fins a las 23 abo un programa ric d'intervents qualifiat d'institucions internacionalas e d'associacions que trabalhon en maniera seriosa e costanta per la promocion de las lengas e culturas.
D'en premier, da part de la Chambra d'òc, la projeccion d'un cort filmat su "L'Occitània a pè" e l'explicacion de las miras de tala iniciativa. Se vai anant abo lo salut de las autoritats:

• Gianni Oliva, Assessor a la cultura de la Region Piemont;
• Remèsi Pech per la Region Miègjorn-Pirenèus;
• Las Províncias de Coni e Turin;
• L'Espaci Occitan;
• Lo Séndic d'Ostana a far lhi onors de casa.
• La matinaa vai anant abo lhi intervents de:
• Vincenzo Pellegrini e Mariella De Nicolò en representança de la Comission Nacionala Italiana per l'UNESCO;
• Domenico Morelli per lo Comitat Nacional de la Federacion Minoranças linguísticas;
• Annamaria Morello, Dirigenta dal Sector Promocion activitats culturalas e Patrimòni cultural e linguístic de la Region Piemont.
• Dins l'après-metzjorn lhi aurèn lhi intervents de:
• Marco Stolfo per lo Servici Identitat linguísticas de la Region Friuli Venezia Giulia;
• Jusèp Loís Sans Socassau per la Segreteria de Política Linguística de la Generalitat de Catalunya;
• Maurizio Gnerre, Ordinari de Linguística de l'Universitat l'Orientala de Napoli;
• Marco Viola dirigent dal Servici Minoranças Linguísticas de la Província de Trento;
• Pèire Brechet, President del'IEO Provença per l'Institut d'Estudis Occitans;
• Gaetano Cistaro, lo Séndic de La Gàrdia que presenta lo trabalh fach dins sa comuna per la lenga e cultura occitanas.

Una jornaa richa d'intervents sus las activitats realizaas e las prospectivas dal futur.
A 9 oras del ser lhi aurè la projeccion del documentari realizat da FR3 Sud sus l'Occitània a pè e après lo concèrt de Aire de Prima abo 14 chants de la tradicion occitana: da "Sem mai de prima" a "Arieja mon país" fins a la chançon aranesa "Adius a la Val d'Aran".
Una jòlia exposicion de l'artista Marie Voillat serè presenta dins la Sala Comuna e representa dui tèxts que la filosòfa Simone Weil a dediat a l'Occitània e que Peire Anghilante a virats en occitan.