Dopo Carcassona
Lo succés de la manifestacion deu portar de mai en mai a una política trinacionala per Occitània
La policia parla de 18.000 e lhi organizaires de 25.000 partecipants, la sie coma s' vòl la manifestacion "Anem! Per la lenga occitana. Òc!" es estat un grand moment collectiu que a demostrat aquò que la Chambra d'Òc a concretament vist e documentat dins la marcia "L'Occitània a pè" de l'an passat.
Es pas dal tot ver que la lenga e la cultura occitana son mòrtas, son viventas, vitalas e sobretot an dins lor tota la semença que pòt far creisser una cultura. Dins l'Occitània contemporanea lhi a de tot: las Calandretas e las escòlas publicas bilinguas, la creacion musicala e la conservacion de la tradicion, la literatura escricha e orala, e tot aquò es liat ensem da la lenga e da lhi símbols fòrts, eretatge d'un passat encara ben vivent dins lhi còrs de chascun di partecipants a la manifestacion. N'avia pro de donar en colp d'uelh a las centenas de bandieras occitanas, de sentir l'imne "Se Chanta" chantat amassa da tota aquela gent arribaa da totas parts d'Occitània per comprene coma, al delai de tanti descors, l'anma d'un paìs se tramanda entre una generacion e l'autra, renovèla una societat e lhi baila un sens acutals.
Lhi a pas una politica trinacionala coerenta per l'occitan, lhi a pas de mejans publics coma la radio e la television que descrivon aquel país, per aüra lhi a pas que de moments com aquel que avem viscut lo 24 d'octobre o projéctes de lònja vista coma per ex. l'Estivada de Rodés o l'Occitània a pè que n'en fan da miralh.
Mas penso que una nòva epòca es en chamin de nàisser, la consciença collectiva d'esser un país sus tres estat encomença a se far larg dins l'esperit de la gent mai sensibla e se sentís una simpatia e se vei una partecipacion granda a projècte qu'an un but trinacional. Projèctes novèls coma Cantem per òc, Chaminem per òc, L'Occitània a pè, Las Valadas Occitanas a pè, l'Estivada de Rodés e Anem! per la lenga occitàna Òc!", fai qualques ans serion estats impensables.
Chal aprene a trabalhar dins lo realisme e la concretessa, chal aprene a èsser realista e idealista dins lo mesmes temps, lo pantai e la realitat devon èsser presents dins chascun de nosautres mas lo pantai es pas una fuga da la realitat, es una via lònja da far, lhi a de dificultats, onte chascun deu prene si riscs mas que ofrís decò novèlas oportunitats, onte de segur lo retrobament d'un veritable esperit de Convivéncia: l'art de viure ensem, ne rapresenta per iu la valor mai granda.
Lo 5 de decembre a Coni un ric programa cultural nos enavisarè entr'autre la manifestacion de Carcassona 2009. Marca-vos sus vòstra agenda la data.
Pòs veire lhi servicis sus http://www.vistedit.com
Meteo Webcam
